“Дээлтэй туулай”-тай танилцахаар Вива сити хорооллыг зорилоо. Энэ бол зөөлөн тоглоом бөгөөд “монгол үйлдвэрлэл” юм. Оёж бүтээдэг хүмүүс нь ээж нар. Энгийн нэг ээж нар биш насаараа “тархины саажилттай хүүхдүүд” буюу одоогийн хэлж заншиж байгаагаар “тусгай хэрэгцээт хүүхдүүд”-ийн ээжүүд. Оёдлын үйлдвэр нь цомхон бөгөөд тэд зай завсаргүй ажилладаг. Тэдний хийсэн “дээлтэй туулай”-наас өгсүүлээд ботго, унага, хурга, ишиг, тугалыг Монголд байдаг гадаадын ЭСЯ-ууд, олон улсын байгууллагынхан худалдан авдаг.

 

#ТЭД_ХИЧЭЭДЭГ: Тус бяцхан үйлдвэр анх 2011 онд байгуулагджээ. Өөрөөр хэлбэл, нийгмийн тусгай хэрэгцээт хүүхдүүдийг “ойлгож чаддаг” хүмүүсийн ажлын байр. 2017 оноос өмнө тусгай хэрэгцээт хүүхдэд улиралд 20000, асран хамгаалагчид нь сард 20000 төгрөгийг улсаас олгодог байсан бол одоо сарын 380000 төгрөгийг хүүхдэд, асран хамгаалагч ээж нарт сарын 280000 төгрөгийг улсаас олгодог болжээ. Ингэж тэтгэмжийн мөнгийг ахиулахын төлөө тэд өөрсдөө хичээж “хандаж болох” бүх газар руу хөлөө эцтэл явцгаасан байдаг. Мөн тэдний хийж чадсан зүйл бол 2017 оноос “халамжаас зээл авах” эрхзүйн орчныг бүрдүүлсэн явдал юм.

 

#ХЭЗЭЭ_Ч_ДУУСАХГҮЙ. Тус үйлдвэрийг “Ханни тоглоомын үйлдвэр” гэдэг. Тэдний хөдөлмөрлөж олсон мөнгө “Ээлтэй ертөнц” ТББ буюу “Энэрэл” гээд асрамжийн төвийн хангамж руу зарцуулагддаг. Тэнд “тусгай хэрэгцээт бага насны хүүхдүүд”-ийг хардаг багш нар бий. Тийм хүүхдүүдийн төрөлт хэзээ ч дуусахгүй, насны хязгаар гэж байхгүй үргэлжилнэ. Тусгай халамж хэрэгтэй, тусгай сэтгэлзүй хэрэгтэй. Тийм учраас “Зөвлөмжийн хөтөлбөр” хэрэгжүүлж тусгай хэрэгцээт 50 хүүхдийн ар гэрт зөвлөмж өгч үйлчилж байна. Энэрэл төвд 13, Ханни үйлдвэрт 8 хүн ажиллаж зөөлөн тоглоомын үйлдвэрлэлээс олсон орлогоосоо цалин, асрах төвийн зардлаа хангаад болгож явна. Энэрэл төвийн байрандаа бас түрээс төлдөг, түрээс нэмэгдвэл энд тэндгүй хямд байр хайж нүүдэг гэв. Тэрийг сонсоод үнэхээр цочиж билээ. Яагаад улсаас тэр түрээсийг нь даачихаж болдоггүй юм бол доо.

 

#ЗАСАЛЧ_НАР: 2023 оноос эхлэн АШУИС-ийн “хөдөлгөөн засал”, “хөдөлмөр засал”-ын ангид тусгай хэрэгцээт хүүхдүүдийн эцэг эх болох 20 хүнийг суралцуулж байна. Ээлтэй ертөнц ТББ-ын захирал Т.Туяажаргалын мөрөөдөл бол Японоос тусгай хэрэгцээт хүүхдүүдтэй ажилладаг багш урихыг хүсдэг. Япон багш нарын арга ажиллагааны техник гайхалтай сурцтай. Биеийн жин хамаарахгүй насанд хүрсэн тусгай хэрэгцээт хүнийг ямар ч түүртэх юмгүйгээр өргөөд түшээд алхуулаад аваад явчихдаг хөдөлгөөний техник тэдэнд байдаг. Ядаж бид нар тэр техникээс нь суралцмаар байна гэж ярьсан юм.

 

#МОНГОЛ ТОГЛООМ БОЛГОХ: Хүүхдээ дагуулаад гэр бүлээрээ аялж яваа жуулчдаа энэ үйлдвэрт зочлуулж туулай оёлцож, хажууд нь хийж болно, мөн таалагдаж байгаа тоглоомуудаас худалдан авч болно. Манай АЖ-ын салбарынхан нийгмийн хариуцлагын хүрээнд тус үйлдвэрээр зочилж бага ч гэсэн өдөр тутмын орлого өгч байвал тэдэнд нэг өдрийн хоол хүнсний асуудлаа шийдэхэд нь ч нэмэр болно, мөн тусгай хэрэгцээт хүүхдүүдийг дэмжсэн чухал үйлс ч болох юм. Жуулчин ч өөртөө сэтгэл хангалуун үлдэх болов уу гэж бодож байна. Өнөөг хүртэл өөрсдийнхөө асуудлыг өөрсдөө шийдвэрлэж тэмцэж ирсэн “Ээлтэй ертөнц” ТББ-ынхнаар бахархахыг хүслээ. Тэдний бүтээгдэхүүнүүдэд монгол дээл, малгай, монгол гутал энэ тэрийг өмсгөж "монгол зөөлөн тоглоомын үйлдвэрлэл" болгон өргөжүүлээд Хархорин, Тэрэлж, Баянзаг, Ёлын ам ... гээд АЖ-ын бүх алдартай газруудад худалдаалдаг болгочихвол мөн ч сайхан аа. Жанжин малгайтай ирвэс, монгол гуталтай мазаалай ... гээд төсөөл дөө.

 

#Аялал_жуулчлалын_бэлэг_дурсгалын_үйлдвэрлэл