Нэрийн хуудасны соёл

XYI-XYII зуунд Венец, Флоренц хотын худалдаачид жижиг цаасан дээр хаяг, овог нэр, албан тушаалаа бичиж харилцагчдаа өгдөг байжээ. 1786 онд Германд анхны хэвлэмэл нэрийн хуудас гарснаар харилцааны соёлын нэг хэрэгсэл болоод зогсохгүй эзнийхээ нийгэмд эзлэх байр суурийг илэрхийлэгч болсон гэдэг. 

Нэрийн хуудсыг уулзсан танилцсан хүн бүхэнд өгдөггүй. Ажил хэргийн холбоо тогтоохыг хүссэн хүндээ энэ санаагаа илэрхийлэн өгдөг.

 

 

  • Хэмжээний хувьд олон улсын стандартаар 85.6 х 53.98 мм байдаг.
  • Байгууллагын нэр, овог нэр, албан тушаал, цол хэргэм, шуудан болон интернет хаяг, утасны дугаарыг бичнэ.
  • Байгууллагын нэрийн өмнө тухайлбал, “Аялал жуулчлалын Онон компани”, “Ноолууран үйлдвэрлэлийн Эвсэг компани” гэх мэтээр тодотгол бичиж болно.
  • Цол хэргэм, зэрэг дэвийн тухайд нэг хуудсан дээр хоёроос илүүг бичдэггүй.
  • Хэрэв олон талт үйл ажиллагаа явуулдаг бол тус тусад нь нэрийн хуудас хийлгэх нь зөв болно.
  • Нэрийн хуудсан дээрх мэдээллийг хоёр хэлээр үйлдэж болох ба энэ нь ажил байдлын онцлогоос шалтгаалан англи хэл, эсвэл очих улсын хэл дээр байвал зүгээр.

 

Ажил хэрэгч хүн нарийн ширхэгтэй, сайн чанарын цагаан цаасан дээр хар өнгөөр тод, дармал үсгийг товойлгон хэвлүүлдэг. Торгон дээр шагласан, модны холтос, үйсэн дээр сийлсэн, сүрчиг шингээсэн эсвэл алтан үсэг, хээ угалз, зурагтай, маяглуулж бичсэн чамин хийцтэй, гоёмсог нэрийн хуудсыг ихэвчлэн зураач, загвар зохион бүтээгч, загвар өмсөгч, урлаг спортын нэрд гарсан хүмүүс хэрэглэдэг.  

Содон байлгахыг хүсвэл байгууллагын эмблемийн оронд эрхэлдэг ажил, мэргэжлийн онцлогийг харуулсан зураг зэргийг буланд нь эсвэл бүдэгхэн дэвсгэрлэх, тод өнгийн цаас сонгох, бичвэрийг босоо байдлаар байрлуулах зэргээр янз бүрийн санаа сэдэж болно. Өөр хүний нэрийн хуудастай адилханыг дуурайж хийлгэх нь зохимжгүй. Банкны ажилтан, аяллын компаний ажилтан хоёрын эрхлэх үйл ажиллагаанд ялгаатай зүйл олон байдаг учраас хэчнээн таалагдсан загвар байсан ч дуурайж хийлгэх нь утгагүй.

  • Нэрийн хуудсаа хүнд өгөхдөө овог нэрээ тод хэлж таны нэрийг шууд уншиж чадахуйцаар тухайн хүн рүү харуулан хоёр гардан өгдөг.
  • Хүнээс нэрийн хуудсыг хоёр гардан хүндэтгэлтэй аваад шууд унших ёстой.
  • Гадаад хүний нэрийг зөв дуудахын тулд лавлан асууж хуудсан дээр нь тэмдэглэж болно.
  • Анх удаа уулзаж байгаа хүмүүс босож зогсоод нэрийн хуудсаа солилцоно.